प्रतिनिधि र प्रदेशसभा निर्वाचन मङ्सिर ४ गते गर्ने सरकारको निर्णय

काठमाण्डाै, १९ साउन २०७९ ।

सरकारले प्रतिनिधि सभा र प्रदेश सभाको चुनाव मङ्सिर ४ गते आइतवार गर्ने निर्णय गरेको छ । प्रधानमन्त्री निवास बालुवाटारमा बसेको मन्त्रिपरिषद्को बैठकले मङ्सिर ४ गते देशैभर एकै चरणमा चुनाव गर्ने निर्णय गरेको हाे ।

सत्ता गठबन्धनको बुधवार बसेको बैठकले आउँदो मङ्सिर ४ गते प्रदेश र प्रतिनिधि सभा सदस्यको चुनाव एकै चरणमा गर्ने गरी सहमति जुटाएको थियो । साेहि अनुरूप बिहीबार दिउँसो १ बजे बसेको मन्त्रिपरिषद्को बैठकले मङ्सिर ४  गते निर्वाचन गर्ने निर्णय गरेको  छ । २०७४ सालमा मङ्सिर १० र २१ मा गरी दुई चरणमा चुनाव भएको थियो ।