सुजन प्रेमी सुवेदी
बागलुङ, २० जेठ २०८० ।
बागलुङको जैमिनीमा बालमैत्री स्थानीय शासन सम्बन्धि नितिगत तथा प्रक्रियागत कार्य व्यवस्थाका लागि नगरस्तरीय अभिमुखिकरण कार्यक्रम सम्पन्न भएको छ । जैमिनी नगरपालिकालाई बालमैत्री स्थानीय शासन युक्त नगरपालिका घोषणा गर्ने तयारी अन्तर्गत बिहिबारबाट सुरु भएको अभिमुखिकरण कार्यक्रम शुक्रबार सम्पन्न भएको हो ।
जिल्लाकै पहिलो बालमैत्री स्थानीय शासन युक्त नगरपालिका घोषणा भएको गलकोट नगरपालिकाका प्रशासकीय अधिकृत तुल बहादुर वि.क र फोकल पर्सन रामचन्द्र शर्माको सहजिकरणमा अभिमुखिकरण भएको जैमिनी नगरपालिकाका महिला तथा बालबालिका शाखा प्रमुख देवि सुनारले जिल्लाखबर डटकमलाई जानकारी दिनुभयो । जैमिनी नगरपालिकाका जनप्रतिनिधि, कर्मचारी सहित सरोकारवालाहरुको उपस्थितिमा भएको कार्यक्रममा बालमैत्री स्थानीय शासन युक्त पालिकाको बारेमा जानकारी गराइएको थियो ।
कार्यक्रममा बालमैत्री स्थानीय शासन भनेको के हो ? बालमैत्री स्थानीय शासन युक्त पालिका घोषणा गर्न किन जरुरी छ ? लगाएतका विषयमा जानकारी गराइएको थियो ।
यसैविच जैमिनी नगरपालिकालाई आगामी ३ बर्ष भित्रमा बालमैत्री स्थानीय शासन युक्त नगरपालिका घोषणा गर्ने प्रतिवद्धता गरिएको छ । जैमिनी नगरपालिकाका नगर प्रमुख नर बहादुर पुनले २०८२ साल चैत मसान्त भित्र जैमिनी नगरपालिकालाई बालमैत्री स्थानीय शासन युक्त नगरपालिका घोषणा गर्ने प्रतिवद्धतामा हस्ताक्षर गर्नुभएको हो ।
विभिन्न सरोकारवालाहरुले सो प्रतिवद्धतामा हस्ताक्षर गरेका छन् । ५१ वटा सूचक पुरा गरेर नगरपालिकालाई बालमैत्री स्थानीय शासन युक्त नगरपालिका घोषणा गर्ने तयारी थालिएको नगरपालिकाले जनाएको छ ।
प्रतिक्रिया दिनुहाेस्