बागलुङ, १८ फागुन २०७९ ।
बागलुङको दमेकमा श्रीमानले कोदालाले हान्दा श्रीमतीको मृत्यु भएको छ । जैमिनी नगरपालिका २ दमेक बनहुँ निवासी ४५ बर्षीय केशव नेपालीले ३५ बर्षीय श्रीमती राधा नेपालीलाई कोदालाले हानेर हत्या गरेका हुन् ।
बिहिबार बारीमा आलु खन्ने क्रममा उनले कोदालोले श्रीमतीको टाउकोमा हानेर गम्भीर घाइते बनाएको र उनको उपचारका लागि अस्पताल लगेकोमा मृत्यु भएको जिल्ला प्रहरी कार्यालय बागलुङका डिएसपी गंगाबहादुर थापाले जानकारी दिनुभयो । बिहान ११ बजेतिर घर भन्दा अन्दाजी २० मिटर टाढा रहेको बारीमा आलु खन्दै गर्दा उनले अचानक श्रीमतीलाई कोदालाले टाउकोले हान्दा घाइते भएको प्रहरीले जनाएको छ । घाइते राधालाई दिउँसो करिव १ बजे धौलागिरी अस्पताल बागलुङ पुराइएकोमा साँढे १ बजे अस्पतालले मृत घोषणा गरेको थियो ।
कोदालाले हानेपछि केशवले झुण्डिएर आत्महत्या गर्न खोजेका थिए । झुण्डिएको अवस्थामा उनका भाउजुले फेला पारेर उनलाई उद्दार गरेको प्रहरीले जनाएको छ । केशवलाई घटनास्थलबाट प्रहरीले नियन्त्रणमा लिएर बागलुङ लगेको बताएको छ । उनकाे अवस्था सामान्य रहेकाे छ । मृतक राधाको धौलागिरी अस्पताल बागलुङमा पोष्टमार्टम पछि आफ्न्तलाई शव बुझाइने अस्पतालले जनाएको छ ।
घटनाको बारेमा थप विवरण आउन बाँकी रहेको प्रहरीले जनाएको छ । यस्तै हिजो नै जैमिनी नगरपालिका ४ सर्कुवा मौलाछमा एक पुरुषले आफ्नै छोरीको हत्या गरेका थिए ।
प्रतिक्रिया दिनुहाेस्