हरि कुमार केसी
बागलुङ, ५ भदौ २०७८ ।
बरेङको लुरुङमा शुक्रबार सामुदायिक स्वास्थ्य इकाईको भवन उद्घाटन गरिएको छ । बागलुङको बरेङ गाउँपालिका वडा नम्बर १ धुल्लुबाँस्कोटको लुरुङमा सामुदायिक स्वास्थ्य इकाईको नवनिर्मित भवनको जिल्ला समन्वय समिति बागलुङका प्रमुख राजेन्द्र ढुङ्गानाले उद्घाटन गर्नुभएको हो ।
उद्घाटन पछि बोल्दै जिसस प्रमुख ढुङ्गानाले बरेङ गाउँपालिकाले स्वास्थ्य लगाएत हरेक क्षेत्रमा उल्लेख्य काम गरेको भन्दै प्रशंसा गर्नुभयो । हरेक क्षेत्रमा विरोध गर्ने मानसिकताको अन्त्य हुनुपर्ने र सबैको सहकार्य र हातेमालोबाट मात्र विकास सम्भव हुने भन्दै उँहाले सबैलाई एकजुट हुन आग्रह गर्नुभएको छ ।
कार्यक्रममा बरेङ गाउँपालिकाका अध्यक्ष कृष्ण प्रसाद शर्माले बरेङ गाउँपालिकाका नागरिकको स्वास्थ्य प्रति आफुहरु जिम्मेवार रहेको बताउनुभयो । सामान्य स्वास्थ्य सेवा लिन घण्टौं हिँड्नुपर्ने अवस्था बरेङ गाउँपालिकामा अन्त्य गरिनृ भन्दै उहाँले नागरिकहरुलाई सर्वसुलभ रुपमा स्वास्थ्य सेवा दिन गाउँपालिका सँधैव तत्पर रहेको बताउनुभयो ।
नवनिर्मित भवन उद्घाटन पश्चात स्वास्थ्य इकाई व्यवस्थापन समितिलाई हस्तान्तरण गरिएको छ । सामुदायिक स्वास्थ्य इकाई स्थापना भए सँगै बरेङ गाउँपालिका वडा नम्बर १ का लुरुङ्ग, कोकल्दिप सहित जैमिनी नगरपालिकाको वडा नम्बर १० का नेवारे, किटेनी, नाम्दुक लगाएत क्षेत्रका बासिन्दा लाभान्वित भएका छन् ।
प्रतिक्रिया दिनुहाेस्