रसुवा, १ कात्तिक २०७८ ।
लात्तीले हानेर श्रीमानले श्रीमतीकाे हत्या गरेका छन् । रसुवाको नौकुण्ड गाउँपालिका ५ भोर्लेकाे डाँडाटोलमा ७६ वर्षका बुधे गाङताङले ६१ वर्षीया श्रीमती बाटुलीलाई लात्तीले हानेर हत्या गरेका हुन् ।
घरायसी विवाद हुँदा बुधेले आइतवार बिहान साढे ११ बजेको समयमा बाटुलीलाई लात्तीले हान्दा उहाँ आँगनमा बजारिएर गम्भीर घाइते हुनुभएकाे थियाे । घाइते बाटुलीलाई एम्बुलेन्समार्फत त्रिशूली अस्पताल पुर्याइएकाेमा परीक्षणपछि चिकित्सकले मृत घोषणा गरेका थिए ।
घटनाबारे जानकारी पाउनासाथ इलाका प्रहरी कार्यालय कालिकास्थानबाट पाँच जनाको टोली खटिएर बाटुलीको घर पुगेको प्रहरी नायब उपरीक्षक (डीएसपी) देवेन्द्र पाण्डेले जानकारी दिनुभयाे ।
बाटुलीका श्रीमानलाई प्रहरीले पक्राउ गरी अनुसन्धान सुरू गरेकाे छ । सामान्य विवादका कारण लात्ताले हानेकाे भएपनि मार्ने याेजना नभएकाे मृतकका श्रीमानले बताएका छन् ।
प्रतिक्रिया दिनुहाेस्