बागलुङ, ९ मंसिर २०७८ ।
सुरक्षित आप्रवाशन परियोजना (सामी) कोे स्थानीय सरकार तथा सरोकारवालासँग समन्वय बैठक कुश्मिसेरामा सम्पन्न भएको छ । बुधबार बागलुङको जैमिनी नगरपालिकाको केन्द्र कुश्मिसेरामा सुरक्षित आप्रवाशन परियोजना (सामी) को बैठक सम्पन्न भएको हो ।
यसअघि जैमिनीका ४ वटा वडाहरुमा सुरक्षित आप्रवाशन परियोजना कार्यक्रम लागु गरिएकोमा यसलाई निरन्तरता कसरी दिन सकिन्छ र आगामी दिनमा अन्य वडाहरुमा कसरी सेवा प्रवाह गर्न सकिन्छ भन्ने विषयमा छलफल भएको सुरक्षित आप्रवाशन परियोजना (सामी) का कार्यक्रम अधिकृत शिव रेग्मीले जानकारी दिनुभयो ।
कार्यक्रममा वित्तिय साक्षरता तथा मनोसामाजिक परामर्श लिएकाहरुलाई आगामी दिनमा आर्थिक उपार्जन तथा उद्धमशिलतामा कसरी जोड्न सकिन्छ भन्ने विषयमा छलफल भएको वित्तिय साक्षरताकी गण्डकी प्रदेश संयोजक जुना केसीले बताउनुभयो ।
बैठकको मुख्य लक्ष्य व्यवसाय बृद्धि गर्ने र पशुपालन र कृषिका कार्यक्रम कसरी प्रभावकारी रुपमा लागु गर्न सकिन्छ भन्ने रहेको उहाँको भनाई छ ।
हाल जैमिनी नगरपालिकाका वडा नं १, २, ४ र ५ मा सामीको कार्यक्रम लागु भएकोमा आगामी दिनमा जैमिनीका वडा नं १ र २ मा कार्यक्रमलाई निरन्तर दिने र वडा नं ६ र ७ मा लागु गर्ने लक्ष्य रहेको रेग्मीले बताउनुभयो ।
हेल्वेटास नेपालको प्राविधिक सहयोगमा सामी परियोजनाले बिदेश जानेहरुलाई न्यायमा पहुँच, सूचनामा पहुँच तथा परामर्श दिने, बिदेशीएकाको परिवारहरुलाई वित्तिय साक्षरता तथा बिदेशबाट फर्केकाहरुलाई मनोसामाजिक परामर्श दिने कार्य गरिरहेको छ ।
स्थानीय सेवा प्रदायक बिवाईसी बागलुङको व्यवस्थापनमा सञ्चालित सुरक्षित आप्रवाशन परियोजना (सामी) बागलुङ जिल्लाको जैमिनी नगरपालिका सहित बागलुङ नगरपालिका, गलकोट नगरपालिका र काठेखोला गाउँपालिकामा सञ्चालित छ ।
प्रतिक्रिया दिनुहाेस्