सुजन प्रेमी
बागलुङ, ९ असोज २०७८ ।
नेपाली कांग्रेस जैमिनी नगर समितिको प्रथम अधिवेशन सुरु भएको छ । नेपाली कांग्रेसको १४ औं महाधिवेशनको कार्यतालिका अनुसार जैमिनीमा प्रथम अधिवेशन सुरु भएको हो ।
नेपाली कांग्रेस जिल्ला कार्य समिति बागलुङका सचिव नवराज पौडेलको विशेष उपस्थितिमा भएको कार्यक्रमको उद्घाटन सत्र सकिएको नेपाली कांग्रेस जैमिनी नगर समितिका सचिव पुरन श्रीसले जानकारी दिनुभयो ।
उद्घाटन सत्रमा बोल्ने वक्ताहरुले पार्टी भित्रै टकराव सिर्जना भए पार्टीको अस्तित्व सकिने भन्दै सबैलाई मिलेर जान आग्रह गरेका छन् ।
यो समाचार तयार पार्दासम्म निर्वाचन समितिले मनोनयन दर्ता गर्ने उम्मेदवारहरुको नामावली प्रकाशन गरेको छ ।
निर्वाचन कार्यतालिका अनुसार उम्मेदवारको् नामावली प्रकाशन भएपछि दावी विरोध र मनोनयन फिर्ताको समय दिइने र अन्तिम नामावली प्रकाशन गरी भोली चुनाव गराउने निर्वाचन अधिकृत ज्ञानेन्द्र पन्तले जानकारी दिनुभयो ।
नेपाली कांग्रेस जैमिनी नगर सभापतिमा वर्तमान नगर सभापति काशिराम आचार्य र दमेकका जन प्रतिनिधि तथा जैमिनी २ का वडा सदस्य समेत रहनुभएका प्रेम सापकोटाको उम्मेदवारी परेको छ ।
उप सभापतिमा ओम बहादुर केसी, किरन शर्मा र विमल श्रीसको उम्मेदवारी परेको निर्वाचन समितिले जनाएको छ । नगर सचिव पदका लागि बम बहादुर क्षेत्री, नारायण अधिकारी र शिव कुमार श्रीसले उम्मेदवारी दिनुभएको छ । सह सचिवमा ईश्वरी प्रसाद चापागाईँ, डिल्लीराज पौडेल, दिपक सुवेदी र बिमल आचार्यको उम्मेदवारी परेको निर्वाचन अधिकृत पन्तले बताउनुभयो ।
नामावली प्रकाशन भएपछि अहिले दावी विरोध तथा उम्मेदवारी फिर्ताको समय छुट्याइएको छ ।
प्रतिक्रिया दिनुहाेस्