सुजन प्रेमी
बागलुङ, १९ असोज २०७८ ।
चाडवाड नजिक आउँदा पनि कुश्मिसेरा बजार भने सुनसान देखिएको छ । पहिले पहिले चाडवाडमा भरीभराउ हुने कुश्मिसेरा बजार अहिले सुनसान बनेको हो ।
बागलुङ जिल्लाको दक्षिणी भेगकै प्रमुख व्यापारिक केन्द्र मानिने कुश्मिसेरा बजार अहिले जैमिनी नगरपालिकाको केन्द्र बनेको छ । नगरपालिकाको केन्द्र बनिसक्दा पनि बजारको व्यापारिक अवस्था नसुध्रिएकोमा व्यापारीहरुको चिन्ता छ । पहिले चाडवाड आउँदा भ्याइनभ्याई हुने गरेको भएपनि विगत ३,४ बर्ष यतादेखि निरन्तर व्यापार घटिरहेको कुश्मिसेरा उपल्लोबजारका फेन्सी व्यावसायी चिरञ्जिवी दाहालले जिल्लाखबर डटकमलाई बताउनुभयो ।
गाउँघरमा मोटवाटो पुगेको र घर घरमा पीकअप गएर सामान पुराइदिने गरेका कारण पनि कुश्मिसेराको व्यापार खस्किएको व्यापारीहरुको भनाई छ । यातयातको सुविधा नहुँदा गाउँबाट एउटै पीकअपमा सिधै जिल्ला सदरमुकाम जाने र सोहि पीकअपमा सामान ल्याएर फर्किनेहरु धेरै भएकाले अहिले कुश्मिसेरामा व्यापार कम भएको व्यापारी कृष्ण थापा बताउनुहुन्छ ।
बजारबाट कुश्मिसेरासम्म नियमित र ठुला गाडीहरु पनि सञ्चालन हुने र कुश्मिसेरा बाट गाउँ गाउँ जाने जीप तथा पीकअपहरु छुटाउने हो भने कुश्मिसेरा बजारको व्यापारमा सुधार आउने व्यावसायीहरुको आशा छ । चाडवाड आउँदा पनि ग्राहकको चहलपहल नहुँदा अहिले व्यापारीहरु लुडो खेलेर बसिरहेका भेटिन्छन् ।
प्रतिक्रिया दिनुहाेस्