बागलुङ, १२ बैशाख २०७९ ।
बागलुङको जैमिनी नगरपालिकामा जयराम आचार्यले नगर प्रमुख पदका लागि स्वतन्त्र उम्मेदवारी दिनुभएको छ । जैमिनी नगरपालिका वडा नं ५ बिनामारे निवासी आचार्यले नगर प्रमुख पदका लागि स्वतन्त्र उम्मेदवारी दिनुभएको हो ।
राजनीतिक दलहरुले अनेक बहाना बनाएर चुनाव जित्ने तर काम गर्न नसक्ने देखिएकाले आफूले स्वतन्त्र उम्मेदवारी दिएको उहाँले बताउनुभयो । अहिले पनि बिभिन्न गठबन्धनका नाममा अयोग्य उम्मेदवार उठाउने र पछि जनताले पछुताउनुपर्ने अवस्था आउन सक्ने भएकाले आफूले उम्मेदवारी दिएको भन्दै उहाँले नागरिकहरुले भोट हाल्दा योग्य र काम गर्नसक्ने उम्मेदवारलाई दिनुपर्ने बताउनुभयो ।
जैमिनीमा सत्ता गठबन्धनको तर्फबाट नगर प्रमुखमा राष्ट्रिय जनमोर्चाका नेता नर बहादुर पुन र उप प्रमखमा नेपाली कांग्रेसका नेता हरिहर शर्माले उम्मेदवारी दर्ता गराउनुभएको छ । यस्तै नेकपा एमालेको तर्फबाट नगर प्रमुखका लागि लिला राना र उप प्रमुखका लागि उषा पौडेलको उम्मेदवारी परेको छ ।
जैमिनीमा पाँच दलीय गठबन्धन भएपनि अधिकांश वडाबाट स्वतन्त्र उम्मेदवारी परेको छ ।
प्रतिक्रिया दिनुहाेस्