बागलुङ, २८ कात्तिक २०७९ ।
बागलुङको जैमिनीमा नमूना मतदान सम्पन्न भएको छ । निर्वाचनमा खटिने कर्मचारीहरुको क्षमता अभिवृत्ति र मत बदर कम गर्नका लागि नमूना मतदान सम्पन्न भएको हो ।
सोमबार कुश्मिसेरा बजारमा भएको नमूना मतदानमा पार्टी प्रतिनिधि, कर्मचारी, सुरक्षाकर्मी सञ्चारकर्मी लगाएत स्थानीयहरुले मतदान गरेका थिए । सोमबार जैमिनी नगरपालिकाको आयोजना र निर्वाचन आयोग बागलुङको समन्वयमा भएको मतदानमा संलग्न कर्मचारीहरुले नमूना मतदानले थप सिकाई भएको बताएका छन् ।
नमूना मतदान सुरु गर्नु अगाडी निर्वाचन कार्यालय बागलुङका सूचना अधिकारी गोकुल शर्माले नागरिकले मनपराएको उम्मेदवारको निर्वाचन चिन्हमा कसरी स्वस्तिक छाप लगाउने र प्रतिनिधि सभा प्रत्यक्ष र समानुपातिक साथै प्रदेश सभा प्रत्यक्ष र समानुपातिकको मतपत्रको पहिचान गर्ने बारे उपस्थित नमूना मतदातालाई सहजिकरण गर्नुभएको थियो । शर्माले निर्वाचन शान्तिपूर्ण गर्न आग्रह गर्दै कर्मचारीहरु सजग हुनुपर्नेमा समेत जोड दिनुभएकाे छ ।
नमूना मतदानमा प्रतिनिधी सभाको प्रत्यक्ष निर्वाचन प्रणालीको लागि सेतो पृष्ठभूमिमा रातो रङको निर्वाचन चिन्ह र अन्य विवरण छापिएको पहिलो मतपत्र मतदाताले लिने र स्वस्तिक छापले आफुले ईच्छाईएको कुनै उम्मेदवारको निर्वाचन चिन्हमा मत सङ्केत गर्ने, मतपत्र सही तरिकाले पट्याउने र सेतो पृष्ठभूमिमा रातो रङले “१” लेखिएको वा सङ्केत भएको मतपेटिकामा मत खसाल्ने प्रकृयाबारे जानकारी गराइएको थियो । प्रतिनिधी सभाको समानुपातिक निर्वाचन प्रणालीको लागि सेतोपृष्ठ भूमिमा कालो रङको निर्वाचन चिन्ह र अन्य विवरण छापिएको दोस्रो मतपत्र मतदाताले लिने र स्वस्तिक छापले कुनै एक राजनीतिक दलको निर्वाचन चिन्हमा मत सङ्केत गर्ने र मतपत्र सही तरिकाले पट्याई कालो रङले “२” लेखिएको वा सङ्केत भएको मतपेटिकामा मत खसाल्न सिकाइएको थियो ।
त्यसै प्रदेश सभाको प्रत्यक्ष निर्वाचन प्रणालीको लागि सेतो पृष्ठभूमिमा रातो रङको निर्वाचन चिन्ह र अन्य विवरण छापिएको तेश्रो मतपत्र मतदाताले लिने र स्वस्तिक छापले आफुले ईच्छाईएको कुनै उम्मेदवारको निर्वाचन चिन्हमा मत सङ्केत गर्ने, मतपत्र सही तरिकाले पट्याउने र सेतो पृष्ठभूमिमा रातो रङले “३” लेखिएको वा सङ्केत भएको मतपेटिकामा मत खसाल्न लगाउनुपर्ने जानकारी गराइएको छ । प्रदेश सभाको समानुपातिक निर्वाचन प्रणालीको लागि सेतो पृष्ठभूमिमा कालो रङको निर्वाचन चिन्ह र अन्य विवरण छापिएको चौथो मतपत्र मतदाताले लिने र स्वस्तिक छापले कुनै एक राजनीतिक दलको निर्वाचन चिन्हमा मत सङ्केत गर्ने र मतपत्र सही तरिकाले पट्याई कालो रङले “४” लेखिएको वा सङ्केत भएको मतपेटिकामा मत खसालेर मतदान केन्द्रबाट बाहिर जाने तरिका समेत नमूना मतदानमा सिकाइएको छ ।
मतदानमा खटिने कर्मचारी र सुरक्षाकर्मीहरुलाई सहज तरिकाबाट मतदान सम्पन्न गर्नका लागि खेल्नुपर्ने भूमिकाको बारेमा प्रष्ट हुन नमूना मतदानले सहज भएको जैमिनी नगरपालिकाका प्रमुख प्रशासकीय अधिकृत चेतनाथ गिरीले बताउनुभयो । नमूना मतदानमा जैमिनी नगरपालिकाका नगर प्रमुख नर बहादुर पुनले पहिलो मतदान गर्नुभएको थियो भने नगर उप प्रमुख हरिहर शर्मा लगाएत पार्टीका प्रतिनिधि, कर्मचारी लगाएतले मतदान गरेका थिए ।
प्रतिक्रिया दिनुहाेस्