बागलुङ, २८ पुस २०७९ ।
एनएमबी बैंक कुश्मिसेराले कुश्मिसेरा प्राथमिक स्वास्थ्य केन्द्रलाई पानी सुद्धिकरण गर्ने मेसिन हस्तान्तरण गरेको छ । बिहिबार जैमिनी नगरपालिकाका नगर प्रमुख सहितको रोहवरमा प्राथमिक स्वास्थ्य केन्द्रलाई पानी सुद्धिकरण गर्ने युरोगार्ड मेसिन हस्तान्तरण गरिएको हो ।
एनएमबी बैंक कुश्मिसेरा शाखाको संस्थागत सामाजिक उत्तरदायित्व तथा वित्तीय साक्षरता कार्यक्रम अन्तरगत कुश्मिसेरा प्राथमिक स्वास्थ्य केन्द्रमा युरोगार्ड जडान गरिदिएको एनएमबी बैंक कुश्मिसेरा शाखाका शाखा प्रवन्धक रेशम शर्मा पौडेलले जानकारी दिनुभयो । स्वास्थ्य संस्थामा आउँदा नागरिकहरुले प्रदुषित पानी पिउन नपरोस् भनेर पानी सुद्धिकरण गर्ने मेसिन जडान गरिएको उहाँको भनाई छ ।
हस्तान्तरण कार्यक्रम पछि बोल्दै जैमिनी नगरपालिकाका नगर प्रमुख नर बहादुर पुनले बैंकले स्वास्थ्य संस्था प्रति गरेको सहयोग अमूल्य रहेको भन्दै धन्यवाद ज्ञापन गर्नुभयो । सामाजिक संघ संस्थाहरुको साथ र सहयोगले नै नगरपालिकाले थप विकासको गति लिने भन्दै उहाँले एनएमबी बैंकले जस्तै अन्य संस्थाहरुले पनि यसैगरी सामाजिक काममा अग्रसर हुनुपर्ने बताउनुभयो ।
कार्यक्रममा शाखा प्रवन्धक पौडेलले जडान गरिएको युरोगार्डको वारेन्टी कार्ड सहितको कागजात समेत स्वास्थ्य संस्थालाई हस्तान्तरण गर्नुभएको छ । नगर प्रमुख नर बहादुर पुनले युरोगार्डबाट पानी थापेर शुभारम्भ गर्नुभएको थियो ।
हस्तान्तरण कार्यक्रममा नगर प्रमुख पुन सहित नगर उप प्रमुख हरिहर शर्मा, प्रमुख प्रशासकीय अधिकृत चेतनाथ गिरी, स्वास्थ्य केन्द्र व्यवस्थापन समितिका अध्यक्ष तथा जैमिनी नगरपालिका वडा नं १ का वडाध्यक्ष विष्णु प्रसाद आचार्य, स्वास्थ्य शाखा संयोजक गोविन्द आचार्य, स्वास्थ्य केन्द्रका निमित्त ईन्चार्ज विदुर शर्मा लगाएतको उपस्थिति रहेको थियो ।
प्रतिक्रिया दिनुहाेस्