बागलुङ, ८ असार २०८० ।
बागलुङको बरेङ गाउँपालिकाले आज शुक्रबार आगामी आर्थिक बर्षको नीति तथा कार्यक्रम र बजेट सभामा प्रस्तुत गर्ने भएको छ । गाउँपालिकाका अध्यक्ष कृष्ण प्रसाद शर्माले गाउँसभाको ११ औं अधिवेशन आह्वान गरी नीति तथा कार्यक्रम र बजेट प्रस्तुत गर्ने कार्यसूचि तय गर्नुभएको हो ।
गाउँपालिकाको सभाहल सुदालामा बिहान ११ बजे बस्ने गाउँसभामा आगामी आर्थिक बर्षको नीति तथा कार्यक्रम र बजेट पेश हुने छ भने आर्थिक बर्ष २०७९।८० को आयव्यव विवरण अनुमोदन र अर्थ सम्बन्धी विधेयक र विनियोजन विधेयक पेश हुने छ ।
बरेङ गाउँपालिकाले यस अघि जिल्लाभरका पालिकाहरु मध्ये सबैभन्दा अघि आफ्नो नीति तथा कार्यक्रम र बजेट ल्याउने गरेको थियो भने यस पटक अन्तिम समय सिमा नजिक आएपछि मात्रै अधिवेशन बोलाएको छ । यो बर्ष जैमिनी नगरपालिका जिल्लाभरबाट नीति तथा कार्यक्रम ल्याउने पहिलो पालिका बनेको छ ।
१० वटा स्थानीय तह रहेको बागलुङमा बागलुङ नगरपालिकाले असार ८ गते नै नगर अधिवेशन गर्ने तयारी गरेको छ भने जैमिनी र बरेङ बाहेक अन्य स्थानीय तहहरुले असार ९ र १० गते अधिवेशन गर्ने तयारी गरेका छन् ।
प्रतिक्रिया दिनुहाेस्