बागलुङ, ५ साउन २०८० ।
बागलुङको जैमिनी नगरपालिकामा चट्याङ पर्दा २ वटा घरको मिटरबक्समा क्षति पुगेको छ । जैमिनी नगरपालिका २ बिराउनेमा चट्याङ पर्दा केशव सापकोटा र राम प्रसाद सापकोटाको घरको मिटरबक्समा क्षति पुगेको हो ।
गयराति घर नजिकै रुखमा परेको चट्याङले २ घरको मिटरबक्स र वाइरिङ पूर्ण रुपमा क्षति भएको प्रहरी चौकी कुश्मिसेराका प्रहरी प्रमुख मिन बहादुर खत्रीले जिल्लाखबर डटकमलाई जानकारी दिनुभयो । अहिले प्रहरी टोली घटनास्थलमा गएको छ । चट्याङबाट मानवीय क्षति भने नभएको उहाँले बताउनुभयो ।
बर्खायाममा बाढी पहिरो र चट्याङको जोखिम हुने भएकाले सतर्क रहन र सुरक्षाका उपाय अपनाउन प्रहरी चौकी कुश्मिसेराले आग्रह गरेको छ । चट्याङबाट बच्न विद्युतका तारहरु सुरक्षित बनाउने, विद्युतीय सामग्रीहरु प्रयोगपछि तार छुटाएर राख्न प्रहरी प्रमुख खत्रीले सबैलाई आग्रह गर्नुभयो । वरपर कुनै विपदका घटनाहरु भए प्रहरी चौकी कुश्मिसेराको फोन नम्बर ९८५७६९००९५ मा फोन गर्न सकिने छ ।
प्रतिक्रिया दिनुहाेस्