सुजन प्रेमी सुवेदी
काठमाडौं, ८ भदौ २०८२ ।
यस वर्षको हरितालिका तीजमा पशुपतिनाथ मन्दिर दर्शन गर्न थप सहज हुने भएको छ । पशुपति क्षेत्र विकास कोषले विशेष पूजाको व्यवस्था र भि.आइ.पी पासको व्यवस्था नगरेकाले सर्वसाधारण भक्तजनलाई दर्शनमा सहज हुने भएको हो ।
४ स्थानबाट २ लाइनको दरले ८ वटा लाइनबाट भक्तजनहरुलाई दर्शनका लागि व्यवस्था मिलाइएको हरितालिका (तीज) पर्व – २०८२ को व्यवस्थापन सम्वन्धमा आयोजित पत्रकार सम्मेलनमा आयोजक पशुपति क्षेत्र विकास कोषकी सूचना अधिकारी अनिता भट्टले जानकारी दिनुभयो । हरितालिका (तीज) पर्वका दिनमा मन्दिर दर्शनका लागि यसपटक कुनैपनि किसिमको पासको व्यवस्था नगरिएको र कुनैपनि प्रकारको विशेष पूजाको व्यवस्था समेत नगरिएको उहाँको भनाई छ ।
मन्दिर दर्शनका लागि गौरीघाट–उमाकुण्ड–दक्षिणामूर्ति–रुद्रगाडेश्वर – वासुकी हुँदै उत्तरढोकाबाट मन्दिर प्राङ्गण प्रवेश गरी पश्चिम मूलढोकाबाट वाहिरी निस्किएर कैलाश दक्षिण जुत्ताचप्पल कक्षबाट जुत्ताचप्पल लिई फर्कने व्यवस्था मिलाइएको छ । यस्तै मित्रपार्क–जयवागेश्वरी–पाचागणेश–भिमसेनस्थान–भूवनेश्वरी–शंकराचार्य मठ दक्षिण हुँदै फलामे पुल पश्चिम सानो ढोकाबाट मन्दिर प्राङ्गण प्रवेश गरी पश्चिम मूलढोका हुँदै वाहिरीने र शंकराचार्य मठ दक्षिण जुत्ताचप्पल कक्षबाट जुत्ताचप्पल लिई फर्कने व्यवस्था मिलाइएको कोषले जनाएको छ । पिंगलास्थान–चारशिवालय–पञ्चदेवल–बज्रघर– दक्षिण ढोकासम्मको लाईनलाई कोटिलिङ्गेश्वर मन्दिर छेउँको सानो ढोकाबाट मन्दिर प्राङ्गण प्रवेश गरी दक्षिण ढोका हुँदै वाहिरीने र पञ्चदेवल पूर्व अस्थायी रुपमा निर्माण गरिएको जुत्ताचप्पल कक्षबाट जुत्ताचप्पल लिई फर्कने व्यवस्था मिलाइएको छ भने तिलगङ्गा–राम मन्दिर हुँदै वागमती नदी पूर्व किनार हुँदै आर्यघाट नजीकको पुल तरेर श्रीपशुपतिनाथ मन्दिरको पूर्व ढोकाबाट प्रवेश गरी पूर्व ढोकाबाटै वाहिरीने र आर्यघाट नजीकको पुलसँगैको अस्थायी जुत्ताचप्पल कक्षबाट जुत्ताचप्पल लिई फर्कने व्यवस्था मिलाइएको सूचना अधिकारी भट्टले बताउनुभयो ।
पास र विशेष पूजाले पनि सर्वसाधारणहरुलाई दर्शनमा ढिलाई हुने भएकाले यो पटक यी व्यवस्था हटाइएको कोषका निमित्त सदस्य सचिव सुभाष चन्द्र जोशीले जानकारी दिनुभयो । यसपटक कोषका कर्मचारी र सुरक्षाकर्मी बाहेक अन्य कुनै स्वयंसेवकलाई आदेशात्मक अधिकार समेत नदिएकाले भक्तजनहरुले उत्साहजनकरुपमा दर्शन गर्न पाउने उहाँले बताउनुभयो ।
मन्दिरमा भिडभाड हुँदा मोबाइल नेटवर्कमा समस्या हुन सक्ने भन्दै कोषले नेपाल टेलिकम र एनसेललाई विटिएस भ्यान राखी मोवाईल सेवालाई मेला क्षेत्रमा सहज बनाउन अनुरोध गरी सोही अनुसार विटिएस भ्यानको व्यवस्था गर्ने जनाएको छ । भक्तजनहरुबाट गौदान, पूर्णपात्रो जस्ता ब्राह्मण प्रयोग गरी गरिने धार्मिक कार्यका लागि यस पटक भकुण्टोल– वनकाली मार्गको दायाँ वायाँ क्षेत्रमा व्यवस्था मिलाइएको छ ।
भक्तजनहरुको सुविधाका लागि मेला क्षेत्रमा सवारी साधनहरुको आवागमनलाई पूर्ण रुपमा रोक लगाइएको कोषका कोषाध्यक्ष नारायण प्रसाद सुवेदीले जानकारी दिनुभयो । पशुपति क्षेत्र सवारी साधन निषेधित क्षेत्र भएको सर्वोच्च अदालतको फैसला निर्देशन समेतलाई पालना गर्ने गरी यस्तो गरिएको उहाँको भनाई छ । भक्तजनहरुले उमाकुण्ड, दक्षिणामूर्तिदेखि महास्नानघर पश्चिमको सडक, भुवनेश्वरी –गौशाला र वनकाली क्षेत्रको दर्शन मार्गमा कुनैपनि सवारी साधनहरु नलैजान आग्रह गरिएको छ । दर्शनका लागि आउने भक्तजनहरुका सवारी साधनहरुलाई विभिन्न स्थानमा पार्किङ्गको व्यवस्था मिलाउन ट्राफिक प्रहरीसंग समन्वय गरिएको बताइएको छ ।
घाट क्षेत्रमा रहेको पुल जिर्ण भएकाले भिडभाड हुँदा पुलमा नबस्न र नउभिन कोषले आग्रह गरेको छ । यस्तै वहुमूल्य गरगहना लगाएर पशुपतिनाथको दर्शनमा नआउन र सकेसम्म स–साना बालबालिकाहरुलाई साथमा लिएर नआउन समेत कोषको आग्रह छ ।
