काठमाण्डाै, १२ भदौ २०८२ ।
सरकारले स्वास्थ्य बीमा समयमा नवीकरण गर्न ताकेता गरेको छ । सेवाग्राहीले प्रभावकारी नठानेर नविकरण नगरेको स्वास्थ्य बीमा नविकरण गर्न सरकारले ताकेता गरेको हो ।
बोर्डले एक सूचना जारि गर्दै असोज भित्र नविकरण नगरेमा चर्को थप शुल्क लाग्ने चेतावनी दिएको छ । नेपाल सरकार अन्तर्गत स्वास्थ्य बीमा बोर्डले सूचना निकालेर विगतमा स्वास्थ्य बीमा गरी नवीकरण नगरेका बीमित परिवारहरूलाई एक पटकका लागि थप शुल्क मिनाहा गर्ने तर आउँदो असोज ३१ गतेपछि भने विलम्ब शुल्कको चर्को दर लागू हुने बताएको छ ।
बोर्डको सूचनामा असोज मसान्तसम्ममा नवीकरण गर्नेहरूका लागि पुरानो योगदान रकममा कुनै थप शुल्क नलाग्ने तर २०८२ साल कात्तिक ३१ गतेपछि शुल्क बढाउँदै लैजाने उल्लेख छ । म्याद सकिएको तीन महिनाभित्र नवीकरण गरेमा कार्यक्रममा आबद्ध हुँदा लाग्ने योगदान रकमको १० प्रतिशत थप शुल्क लाग्नेछ । त्यसपछि ६ महिनाभित्र नवीकरण गरेमा योगदान रकमको ३० प्रतिशत थप शुल्क लाग्ने बोर्डले जनाएको छ ।
बोर्डको सूचना अनुसार ६ महिनादेखि एक वर्षभित्र नवीकरण गरेमा योगदान रकमको ५० प्रतिशत थप शुल्क लाग्नेछ । एक वर्षभन्दा बढी भएमा योगदान रकमको शतप्रतिशत थप शुल्क लाग्नेछ । दुई वर्षभन्दा बढी भएमा याेगदान रकमको तीन गुणा बराबरको शुल्क लाग्नेछ । तीन वर्षभन्दा बढी भएमा योगदान रकमको चार गुणा बराबरको शुल्क लाग्ने उल्लेख छ ।
बीमाको कार्यक्रम प्रभावकारी नभएर नै अहिले नविकरण नगर्ने दर बढ्दै गएको छ । सेवा लिनका लागि अस्पतालमा अनेकौं झन्झट व्यहोर्नुपरेको, रेफर अनिवार्य भएको, बढी मूल्य पर्ने र आवश्यक औषधि बीमाको सेवामा भएपनि अस्पतालमा नपाइने लगायतका समस्या नागरिकहरुले झेल्नुपरेको छ । सेवाकै कारण नविकरण नभएको स्वास्थ्य बीमा अब जरिवाना तिरेर नविकरण गराउन सेवाग्राही तयार नहुने देखिन्छ ।
बोर्डको सूचना हेर्नुहोस्
