काठमाण्डाै, ०५ भदौ २०८२ ।
निरोगी नेपाल बनाउन सरकारले ६ महिनादेखि ५ वर्षसम्मका बालबालिकालाई राष्ट्रिय कार्यक्रम सञ्चालन गरी स्वर्णप्राशन खुवाउन लागेको छ । देशभरका २५ जिल्लाका आयुर्वेद अस्पतालबाट बालबालिकालाई राष्ट्रिय कार्यक्रम सञ्चालन गरी स्वास्थ्य तथा जनसङ्ख्या मन्त्रालयले स्वर्णप्राशन खुवाउन लागेको हाे ।
आज बिहान ८ बजे धनगढी आयुर्वेद अस्पतालबाट स्वास्थ्यमन्त्री प्रदीप पौडेलले स्वर्णप्राशन खुवाउने राष्ट्रिय कार्यक्रमकाे शुभारम्भ गर्नु हुने छ । बालबालिकाको शरीरमा रोगसँग लड्ने क्षमताको विकास गर्न हरेक महिनाको पुष्य नक्षत्रका दिन स्वर्णप्राशन खुवाउन लागिएको मन्त्रालय स्रोतले जनाएको छ ।
नयाँ आर्थिक वर्षसँगै देशभरका २५ जिल्ला र आउँदाे आर्थिक वर्षदेखि ७७ वटै जिल्लामा लागू हुने गरी कार्यक्रम अघि बढेको आयुर्वेद तथा वैकल्पिक चिकित्सा विभागले जनाएको छ । विभागका महानिर्देशक डा. श्यामबाबु यादवका अनुसार स्वर्णप्राशन परम्परागत रूपमा प्रयोग भए पनि आमबालबालिकाको हकमा प्रयोग गर्नका लागि वैज्ञानिक पुष्टिको खोजीपछि नेपाल सरकारले यो वर्षदेखि लागू गरेको हाे ।
स्वर्णप्राशन घ्यु, मह र सुनको भष्म मिलाएर बनेको आयुर्वेदिक पोषक तत्त्व हो । मह र घिउ समान मात्रामा प्रयोग गरेर खाँदा विषाक्त हुने भए पनि महको दोब्बर घिउको मात्रा मिलाएर खाँदा आयुर्वेद अनुसार पनि स्वस्थकर हुने महानिर्देशक यादवले जानकारी दिनुभयो ।
६ महिनामुनिका शिशुलाई आमाको दूधबाहेक केही खुवाउन नहुने भनिएकोले उनीहरूको हकमा स्वर्णप्राशन कार्यक्रम लागू नहुने पनि विभागले जनाएको छ ।
डा. यादवका अनुसार बालबालिकालाई सानैमा यो पोषक तत्त्व खुवाएमा पछि गएर स्वस्थ शरीर बन्ने प्रयोजनका लागि यो कार्यक्रम समावेश गरिएको हो । यो कार्यक्रमले रोग लाग्नुभन्दा पहिला नै प्रतिरक्षा प्रणाली बलियो बनाउने हुनाले निरोगी नेपाल अभियानलाई सहयोग पुग्ने दाबी उहाँले गर्नुभयो । साथै बालबालिकालाई स्वर्णप्राशन निर्धक्क भएर खुवाउन पनि सबै अभिभावकलाई डा. यादवले आग्रह गर्नुभएको छ । उहाँले केही गरी बालबालिकालाई स्वर्णप्राशन खाने दिन ज्वरो, रुघाखोकीजस्ता समस्या देखिएमा अर्को महिनाको पुष्य नक्षत्रका दिन खुवाउन पनि सुझाव दिनुभएको छ ।
यो कार्यक्रम २५ जिल्लामा लागू गर्नुअघि चालू आर्थिक वर्षमा नेपालका ३ वटा जिल्ला– दाङ, चितवन र पर्सामा नमूना कार्यक्रमका रूपमा सञ्चालन गरिएको थियो । नेपालको आयुर्वेद चिकित्सामा यो औषधि राजपरिवारमा पहिलादेखि नै अभ्यासमा रहेको आयुर्वेद तथा वैकल्पिक चिकित्सा विभागका महानिर्देशक यादवले जानकारी दिनुभयो ।
सुनको भष्मबाट यो पोषक तत्त्व बन्ने भएकोले यो पोषक खानेकुराका लागि महँगो पर्ने भए पनि बृहत् उत्पादन गर्दा न्यून बजेटले पुग्ने उहाँले बताउनुभयो । यो कार्यक्रम देशभरि सञ्चालन गर्न २५ करोड रुपैयाँ पर्न आउने यादवकाे भनाइ छ ।
