काठमाडौँ, २७ फागुन २०८२ ।
वाणिज्य विभागले नेपाल आयल निगमसँग ग्यास आयात र बिक्रीको तथ्याङ्क मागेको छ । विश्व बजारमा ग्यासको अभाव र मूल्यवृद्धिसँगै यसको असर नेपालमा पर्न सक्ने जोखिम बढेपछि वाणिज्य, आपूर्ति तथा उपभोक्ता संरक्षण विभागले नेपाल आयल निगमसँग आयात र बिक्रीको तथ्याङ्क मागेको हो ।
अभावको समस्या समाधान गर्न निगमलाई मन्त्रालयस्तरमा एउटा ठोस कार्ययोजना पेस गर्न र सबै सरोकारवालासँग छलफल गर्न निर्देशन दिइएको विभागका निर्देशक नरहरि तिवारीले जानकारी दिनुभयो । उपभोक्ताले सहजै ग्यास पाउन नसकेको झन्डै दुई महिना भइसकेको छ । उपभोक्ता मर्कामा परेका छन् । तर निगमले ग्यासको आपूर्तिमा अहिलेसम्म कुनै समस्या नरहेको दाबी गर्दै आएको छ । ग्यास अभाव नभएको भने पनि केही बिक्रेताले निगमतले तोकेको प्रतिसिलिन्डर १ हजार ९१० रुपैयाँभन्दा धेरै मूल्यमा ग्यास बिक्री गरिरहेका छन् ।
निगमका प्रवक्ता मनोज ठाकुरले बजारमा मागअनुसार ग्यास आपूर्ति भइरहेको र कृत्रिम अभाव सिर्जना गर्ने र बढी मूल्य लिने बिक्रेतामाथि कडा निगरानी भइरहेको बताउनुभएको छ । धेरै मूल्य लिने बिक्रेतालाई कारबाही गर्ने अधिकार वाणिज्य विभागसँग रहेको र त्यसका लागि जानकारी गराएको पनि उहाँले बताउनुभयो ।
ठाकुरका अनुसार ग्यास वितरणलाई पारदर्शी बनाउन निगमले हिजो उद्योगी र बिक्रेतालाई बोलाएर निर्देशन पनि दिएको छ । यसअनुसार अबदेखि ग्यास उद्योगीले कुन बिक्रेता (डिलर) लाई कति ग्यास पठाएको हो, त्यसको स्पष्ट रेकर्ड राख्नुपर्नेछ । त्यस्तै बिक्रेताहरूले पनि कुन उपभोक्तालाई ग्यास बिक्री गरेको हो, उनीहरूको नाम र फोन नम्बरसहितको विवरण अनिवार्य रूपमा राख्नुपर्ने व्यवस्था गरिएको छ ।
निगमले अहिले होटल तथा औद्योगिक प्रयोजनभन्दा ‘घरायसी प्रयोजन’ लाई पहिलो प्राथमिकतामा राखेर ग्यास वितरण गर्न उद्योगीलाई निर्देशन दिएको छ । ग्यासको मौज्दात नराख्न र आवश्यकताका आधारमा मात्र वितरण गर्न भनिएको छ । उपभोक्तालाई पनि अनावश्यक मौज्दात नगर्न भनिएको छ ।
अहिले बजारमा ग्यासको अभाव सिर्जना भएको छ । तर ग्यासको आयात भए साविक अनुसारकै भैरहेको निगमको तथ्याङ्क छ । ग्यास कम्पनीको डिपोमा ग्यास आयात भैरहेको देखिएपनि बजारमा भने माफियाहरुले कालोबजारी गर्न ग्यास लुकाइरहेका छन् ।